Последование молебного пения о сущих в темницах и заточении

По обычном начале псалом 141:
Гласом моим ко Господу воззвах, гласом моим ко Господу помолихся. Пролию пред Ним моление мое, печаль мою пред Ним возвещу, Внегда исчезати от мене духу моему: и Ты познал еси стези моя: на пути сем, по немуже хождах, скрыша сеть мне. Смотрях одесную и возглядах, и не бе знаяй мене: погибе бегство от мене, и несть взыскаяй душу мою. Воззвах к Тебе, Господи, рех: Ты еси упование мое, часть моя еси на земли живых. Вонми молению моему, яко смирихся зело: избави мя от гонящих мя, яко укрепишася паче мене. Изведи из темницы душу мою, исповедатися имени Твоему. Мене ждут праведницы, дондеже воздаси мне.
Псалом избранный:
Бог нам Прибежище и Сила, Помощник в скорбях обретших нас зело (45/2). Скорбь и болезнь обретох, и имя Господне призвах: о Господи, избави душу мою (114/3–4). Не удали щедрот Твоих от мене, яко одержаша мя злая, имже несть числа (39/12, 13). Господи, услыши молитву мою и вопль мой к Тебе да придет. Не отврати лица Твоего от мене; воньже аще день скорблю, приклони ко мне ухо Твое; воньже аще день призову Тя, скоро услыши мя. Яко исчезоша яко дым дние мои, и кости моя яко сушило сосхошася. Уязвен был яко трава, и изше сердце мое, яко забых снести хлеб мой. От гласа воздыхания моего прильпе кость моя плоти моей (101/2–6). Благоволи, Господи, избавити мя, во еже помощи ми вонми (39/14). Услыши, Боже, моление мое, вонми молитве моей. К Тебе воззвах, внегда уны сердце мое (60/2, 3). Внуши, Боже, молитву мою и не презри моления моего, вонми ми и услыши мя; возскорбех во искушении моем и смятохся. Сердце мое смятеся во мне и боязнь смерти нападе на мя, страх и трепет прииде на мя и покры мя тьма. И рех: кто даст ми крыле, яко голубине, и полещу, и почию (54/2–3, 5–7). Очи мои изнемогосте от нищеты, воззвах к Тебе, Господи, весь день, воздех к Тебе руце мои (87/10). В день скорби моея воззвах к Тебе (85/7). Господи Боже сил, доколе гневаешися на молитву рабов Твоих? Напитаеши нас хлебом слезным, напоиши нас слезами в меру (79/5–6). Душ убогих Твоих не забуди до конца (73/19). Не остави мене, Господи Боже мой, не отступи от мене, вонми в помощь мою, Господи спасения моего (37/22–23). Сотвори со мною знамение во благо, и да видят ненавидящии мя, и постыдятся, яко Ты, Господи, помогл ми и утешил мя еси (85/17).
Слава, и ныне. Аллилуия (трижды).
Ектения великая:
Миром Господу помолимся.
О свышнем мире:
О мире всего мира:
О еже простити рабам Своим (рабу Своему, рабе Своей) (имя рек) во узилищах сущим, все согрешения их (его, ея) и милостиву и благоуветливу быти им (ему, ей), Господу помолимся.
О еже вскоре услышати глас моления нашего и от уз и темницы милостивно свободити рабов Своих (раба Своего, рабу Свою), Господу помолимся.
О еже, якоже иногда прилежную Церкви Своея о Петре молитву, и нашу ныне милостивно услышати и от уз свободити рабов Своих (раба Своего, рабу Свою) Господу помолимся.
О еже сотворити милость с рабами Своими (рабом Своим, рабой Своей) и от всех бед и нужды и от узилища, якоже древле Иосифа во Египте, силою Своею скоро свободити их (его, ея), Господу помолимся.
О избавитися:
Заступи, спаси:
Пресвятую, Прeчистую:
Возглас: Яко подобает:
На Бог Господь:
Тропарь, глас 2:
Манассию от уз и горькаго заточения молитв ради свободивый, Всещедрый Боже, и рабов Твоих, о нихже (и раба, Твоего о нем же; и рабу Твою, о ней же) мы ныне моление Тебе приносим, от уз и заточения свободи и от всякаго злаго обстояния избави, яко Един Человеколюбец.
Слава, и ныне.
Кондак, глас 5:
Яко милосердия Источник и благости Пучина, Христе Боже, не презри в скорбях и бедах сущих (сущаго, сущую), Тебе верою призывающих (призывающаго, призывающую), но яко Щедр помилуй, и от уз скоро свободи, да поем Ти: аллилуия.
Прокимен, глас 7: Изведи из темницы душу мою, исповедатися имени Твоему.
Стих: Вонми молитве моей, яко смирихся зело.
Апостол в Деяниях, зач. 29 (12, 1–11).
Во дни оны, возложи Ирод царь руце озлобити некия иже от Церкве. Уби же Иакова брата Иоаннова мечем. И видев, яко годе есть иудеем, приложи яти и Петра: бяху же дние опресночнии. Егоже и ем всади в темницу, предав четырем четверицам воинов стрещи его, хотя по Пасце извести его к людем. И убо Петра стрежаху в темнице: молитва же бе прилежна бываемая от Церкви к Богу о нем. Егда же хотяше его извести Ирод, в нощи той бе Пeтp спя между двема воинома, связан железнома ужема двема, стражие же пред дверьми стрежаху темницы. И се Ангел Господень предста, и свет возсия в храмине: толкнув же в ребра Петра, воздвиже его глаголя: востани вскоре. И спадоша ему ужа железная с руку. Рече же Ангел к нему: препояшися, и вступи в плесницы твоя: сотвори же тако. И глагола ему: облецыся в ризу твою, и последствуй ми. И изшед в след его идяше: и не ведаше, яко истина есть бывшее от Ангела, мняше же видение зрети. Прошедша же первую стражу и вторую, приидоста ко вратом железным, вводящим во град, яже о себе отверзошася има: И изшедше преидоша стогну едину, и абие отступи Ангел от него. И Петр быв в себе, рече: ныне вем воистину, яко посла Бог Ангела Своего, и изъят мя из руки Иродовы, и от всего чаяния людей Иудейских.
Аллилуия, глас 4:
Стих: Из глубины воззвах к Тебе, Господи, Господи услыши глас мой.
Стих 2: Да будут уши Твои внемлюще гласу моления моего.
Евангелие от Иоанна, зач. 31 (8, 31–36).
Рече Господь к веровавшим к Нему иудеем: аще вы пребудете во словеси Моем, воистинну ученицы Мои будете. И разумеете истину, и истина свободит вы. Отвещаша и реша Ему: семя Авраамле есмы, и никомуже работахом николиже, како Ты глаголеши, яко свободни будете? Отвеща им Иисус: аминь аминь глаголю вам, яко всяк творяй грех, раб есть греха. Раб же не пребывает в дому во век: сын пребывает во век. Аще убо Сын вы свободит, воистинну свободни будете.
Ектения сугубая:
Помилуй нас Боже:
Петра от уз и темницы изведый и невредна Церкви Твоей представивый, Христе, и рабов Твоих в заточении сущих (раба Твоего в заточении суща, рабу Твою, в заточении сущую), яко Милосерд помилуй и от уз свободи, молимся Тебе, Всемилостивый Спасе, услыши и помилуй.
Избавляяй нища от сильна, и убога емуже несть помощника, в беде и в заточении, и во узах сущих (суща, сущую), яко Щедр милостивно свободи, прилежно молимся Тебе, скоро услыши и яко Щедр помилуй.
Иосифа в темницы древле во Египте заключеннаго преславно свободивый и ныне рабов Твоих (раба Твоего, рабу Твою) в заточении сущих (сущаго, сущую) от уз и горькия беды избави, молимся Тебе, Избавителю милостивый, услыши и скоро помилуй.
Возглас: Услыши ны, Боже:
 
Молитва
Господи Иисусе Христе Боже наш, святаго апостола Твоего Петра от уз и темницы без всякаго вреда свободивый, смиренно молим Тя: приими милостивно моление наше о оставлении грехов рабов Твоих (раба Твоего, рабы Твоея) в темницу всажденных (всажденнаго, всажденную) и молитвами апостола Твоего и всех святых, яко Человеколюбец, всесильною Твоею десницею от всякаго злаго обстояния избави и на свободу скоро изведи, да благодарно славят (славит) Тя и Безначальнаго Твоего Отца и Святаго Духа во веки веков. Аминь.
Отпуст:
Христос, истинный Бог наш, молитвами Пречистыя Своея Матери, силою Честнаго и Животворящаго Креста; предстательством святых Ангелов Хранителей наших;святых славных первоверховных апостолов Петра и Павла, и прочих святых славных и всехвальных апостолов; святаго праведнаго Иосифа Прекраснаго; святой великомученицы Анастасии Узорешительницы; святаго священномученика Ермогена, патриарха Московскаго и всея Руси; преподобнаго и благовернаго князя Иоанна Угличскаго, во иноцех Игнатия, Вологодскаго чудотворца; святых славных добропобедных мучеников; святых праведных Богоотцев Иоакима и Анны и всех святых, помилует и спасет нас, яко Благ и Человеколюбец.